ಅಮ್ಮ ಹಾಗು ಮನುಷ್ಯ ಪ್ರಯತ್ನ

ಅಮ್ಮನಿಗೆ ತುಂಬ ನಂಬಿಕೆಯಿದ್ದದ್ದು ಮನುಷ್ಯ ಪ್ರಯತ್ನದ ಮೇಲೆ, ಹಾಗಂತ ಆಕೆಯೇನೂ ನಾಸ್ತಿಕಳಾಗಿರಲಿಲ್ಲ. ಆದರೆ ಆಕೆಯ ದೇವರ ಕಲ್ಪನೆ ಸ್ವಲ್ಪ ವಚನಕಾರರನ್ನು ಹೋಲುತಿದ್ದದ್ದು ಕಾಕತಾಳಿಯವೇನಲ್ಲ. ಕೆಲಸ, ನಿಯತ್ತು, ದುಡಿಮೆ, ಸಮಾನತೆ ಹಾಗು ಮನುಷ್ಯ ಪ್ರಯತ್ನಗಳ ಮೇಲೆ ಆಕೆಗೆ ನಂಬಿಕೆ ಜಾಸ್ತಿ.

ಅಮ್ಮ ಕೆಲವು ಹಬ್ಬ, ಹರಿದಿನಗಳನ್ನು ಆಚರಿಸುತಿದ್ದರು (ಸಂಕ್ರಾತಿ ಹಾಗೂ ಯುಗಾದಿ ಆಕೆಯ ನೆಚ್ಚಿನ ಹಬ್ಬಗಳು), ಆಕೆಯ ದೇವರ ಮೇಲಿನ ನಂಬಿಕೆ ಮೂಡನಂಬಿಕೆಗಳಾಗಿರಲಿಲ್ಲ. ಆಕೆ ಕೂತು ಪ್ರಾರ್ಥನೆ ಮಾಡಿದ್ದು ನಾ ಕಂಡಿಲ್ಲ, ಹೆಚ್ಚೈಂದರೆ ಎಲ್ಲಿ ಕೂತಿರುತಿದ್ದಳೋ ಅಲ್ಲೆ ನೆನಪಿಸುಕೊಳ್ಳುತಿದ್ದಳು. ನಮಗೆ ಬುದ್ದಿ ಬಂದ ಮೇಲೆ ಯಾವುದನ್ನು ನಮ್ಮ ಮೇಲೆ ಹೇರಿರಲಿಲ್ಲ, ಒಮ್ಮೆಯೂ ನನ್ನ ಪೂಜೆ ಮಾಡು ಅನ್ನಲಿಲ್ಲ. ಆದರೆ ಒಂದು ದಿನ ಕೆಲಸಕ್ಕೆ ಹೋಗದ್ದಿದ್ದರೆ ವಿಚಾರಿಸುತಿದ್ದಳು. ಕಾಯಕವೇ ಕೈಲಾಸ ಅನ್ನುವದನ್ನು ಅಕ್ಷರಶಃ ನಂಬಿದ್ದಳು. ಅದನ್ನೆ ನಮಗೂ ಕಲಿಸಿದಳು.

ನನ್ನ ಮದುವೆಯಲ್ಲೂ ಸಹ ಅಮ್ಮ ತುಂಬಾ ಸಂತೋಷಪಟ್ಟಿದ್ದಳು. ಚಿಕ್ಕ ಮದುವೆ, ಹೊಸ ಆಚಾರ, ನನ್ನ ಗಡ್ಡ, ನಾನು ಅರಿಶಿನದಸ್ನಾನವನ್ನು ವಿರೋಧಿಸಿದ್ದು, ಯಾವುದು ಆಕೆಯ ನನ್ನ ಮೇಲಿನ ಹೆಮ್ಮೆಯನ್ನೂ ಕಡಿಮೆ ಮಾಡಲಿಲ್ಲ. ಅದಕ್ಕೆ ನಾನು ಋಣಿ.

ನನಗಿನ್ನೂ ಜ್ಞಾಪಕವಿದೆ, ನನ್ನ ಮೊದಲ ಕೆಲಸಕ್ಕೆ ಸೇರಿದಾಗ ಆಕೆಯ ಆಗಿನ ಸಂಬಳ ಹಾಗೂ ನನ್ನ ಸಂಬಳ ಒಂದೇ ಇತ್ತು, ನನ್ನ ಕೆಲಸದ ಬಗ್ಗೆಯೂ ತುಂಬ ಹೆಮ್ಮೆ ಇತ್ತು ಆಕೆಗೆ, ಅದಕ್ಕೆ ಅಂದು ಆಕೆ ಹೇಳಿದ ಮಾತು ಇನ್ನೂ ಇವತ್ತಿಗೂ ಗುನುಗುಡುತಾ ಇದೆ “ತಗೋಳ ಸಂಬಳಕ್ಕೆ ಮೋಸ ಆಗಬಾರದು”, “ನಾನು ಕೆಲಸಕ್ಕೆ ಅಲೆದಿದ್ದೇನೆ ನಿನಗೆ ಒಲಿದು ಬಂದಿದೆ, ಕಾಪಾಡಿಕೊ”. ನಾನು ಅದನ್ನು ಕಾಪಾಡಿಕೊಂಡು ಬಂದಿದ್ದೇನೆ. ಇತ್ತೀಚೆಗೆ ನಾನು ಮಾಡುವ ಕೆಲಸದ ಬಗ್ಗೆ ಅಷ್ಟೇನೂ ಗೊತಿಲ್ಲದಿದ್ದರು “ನನ್ನ ಮಕ್ಕಳು ಸರಿ ದಾರಿಯಲ್ಲಿ ಇದ್ದಾರೆ” ಅನ್ನುವ ಅಚಲ ನಂಬಿಕೆ ಆಕೆಯದು.

ಅಮ್ಮ ಸ್ತ್ರೀವಾದಿ, ಆದರೆ ಅದನ್ನು ಅವಳು ಸಮಾನತೆ ಅಂದುಕೊಂಡ್ದಿದ್ದಳು, ಯಾವತ್ತೂ ನಾನು ಸ್ತ್ರಿವಾದಿ ಅಂತ ಮಾತಾಡಲಿಲ್ಲ, ಆಕೆಯ ಕಾರ್ಯಗಳೆ ಆದನ್ನ ವ್ಯಕ್ತ ಪಡಿಸುತಿದ್ದವು. ನನ್ನ ಹಾಗೂ ನನ್ನ ತಂಗಿಯನ್ನ ಸಾಮನವಾಗಿ ಬೆಳಸಿದಳು.ನಮ್ಮಲ್ಲಿ ಇವತ್ತು ಕಿಂಚಿತ್ತಾದರೂ ಸಮಾನತೆಯ ಅರಿವಿದೆ ಅಂದರೆ ಅದಕ್ಕೆ ಅಮ್ಮನೇ ಕಾರಣ.

ಹಾಗಂತ ಅಮ್ಮ ತುಂಬಾ ಪ್ರಗತಿಪರಳೇನು ಆಗಿರಲ್ಲಿಲ್ಲ. ಅವಳಿಗೆ ಅವಳದೆ ಆದ ಮಿತಿಗಳಿದ್ದವು. ಆದರೆ ಹೊಸ ವಿಚಾರ, ಆಚಾರಗಳಿಗೆ ಮುಕ್ತ ಮನಸ್ಸಿನಿಂದ ತೆರೆದುಕೊಳ್ಳುತಿದ್ದಳು. ನಾನು ಅಮ್ಮ, ತಾಲಿಯ ಬಗ್ಗೆ ಮಾತಾಡಿದ್ದು, ಇನ್ನೂ ಹಸಿರಾಗಿದೆ. ಅಮ್ಮ ಹುಟ್ಟು, ಬೆಳದ ಪರಿಸರದಲ್ಲಿ ತಾಲಿಗೆ ತುಂಬಾ ಮಹತ್ವ. ನನ್ನ ಮದುವೆಯ ನಂತರ ಅಂಜು ತಾಲಿ ತೋಟ್ಟಿದ್ದು ಕಡಿಮೆಯೇ. ಅದರ ಬಗ್ಗೆ ಅಮ್ಮ ಹಾಗೂ ನಾನು ಮಾತಾಡಿದ್ದು ಒಮ್ಮೆ ಮಾತ್ರ. ಅದೂ ಕೂಡ ಅಮ್ಮ ಮನುಷ್ಯ ಸಂಬಂಧಗಳು “ಮನುಷ್ಯ ಪ್ರಯತ್ನ” ಅಂತಲೇ ಮಾತು ಮುಗಿಸಿದ್ದಳು.

ಉಳ್ಳವರು ಶಿವಾಲಯ ಮಾಡಿಹರು,
ನಾನೇನ ಮಾಡುವೆ ಬಡವನಯ್ಯಾ.
ಎನ್ನ ಕಾಲೇ ಕಂಬ, ದೇಹವೇ ದೇಗುಲ,
ಶಿರ ಹೊನ್ನ ಕಲಶವಯ್ಯಾ.
ಕೂಡಲಸಂಗಮದೇವಾ, ಕೇಳಯ್ಯಾ
ಸ್ಥಾವರಕ್ಕಳಿವುಂಟು, ಜಂಗಮಕ್ಕಳಿವಿಲ್ಲ.
ಬಸವಣ್ಣ

You may also like...

Leave a Reply

Your email address will not be published. Required fields are marked *